İsmayıllıda gəzməli yerlər

İsmayıllı Azərbaycanın təbiətində minlərlə yaşıllıqlarla bəzədilmiş yüksək dağlar, sərin dərələr və meşələrdən ibarətdir. Bütün bunlar bölgənin nəhəng təbii sərvətlərini ortaya qoyur. Buradakı hər künc təbiətin saf gözəlliyi ilə doludur. Tarix həvəskarları keçmişi izləmək üçün saysız-hesabsız imkanlarla rastlaşırlar. ismayilli təbiətdə dinclik tapmaq istəyənlər və kəşf etmək arzusunda olan səyahətçilər üçün ideal nöqtədir. Uca dağlardan və zirvələrdən tutmuş gur yaşıl dərələrə qədər hər addımda sizi valeh edəcək mənzərələr mövcuddur Hər kənd, hər meşə, hər dərə bu bölgəni kəşf etmək istəyənləri unudulmaz səyahətə aparır. Tur.az İsmayıllı rayonunun ən maraqlı məkanlarını təqdim edir.

Basqal

Basqal zəngin tarixi və mədəni irsi ilə seçilən qədim yaşayış məntəqələrindən biridir. Buradakı daş döşənmiş küçələr, ənənəvi evlər və tarixi tikililər Azərbaycan memarlığının xüsusiyyətlərini əks etdirir. Basqal xüsusilə kəlağayı sənəti ilə məşhurdur. Əsrlər boyu davam etdirilən ipəkçilik və kəlağayı istehsalı bu gün də qəsəbənin əsas mədəni dəyərlərindən sayılır. Tarixi hissədə gəzərkən sənətkarlıq ənənələri və qədim yaşayış mühiti ilə yaxından tanış olmaq mümkündür. Basqalın tarixi ərazisi dövlət tərəfindən qorunan qoruq statusuna malikdir.

Lahıc

İsmayıllının ən məşhur tarixi yaşayış məntəqələrindən olan Lahıc misgərlik sənəti ilə tanınır. Burada hazırlanan mis qablar, dolçalar, sinilər və müxtəlif bəzək əşyaları yerli sənətkarlığın nümunələridir. Lahıc misgərlik sənəti UNESCO-nun Qeyri-Maddi Mədəni İrs üzrə Reprezentativ Siyahısına daxil edilib. Daş döşənmiş dar küçələr, qədim evlər və sənətkar emalatxanaları Lahıcın tarixi görünüşünü qoruyur. Ziyarətçilər emalatxanalarda ustaların işini izləyə və əl işi məhsullar əldə edə bilərlər.

İsmayıllı dağları

İsmayıllının böyük hissəsi Böyük Qafqazın cənub yamaclarında yerləşir. Dağlar, meşələr, çay dərələri və müxtəlif yüksəkliklər rayonun təbiətini zənginləşdirir. Bu ərazilər piyada yürüşləri, təbiət gəzintiləri və dağ marşrutları üçün əlverişlidir. Yüksəkliklərdən ətraf kəndləri, meşələri və dağ silsilələrini seyr etmək mümkündür. Rayon ərazisində yerləşən qorunan təbiət sahələri isə yerli flora və faunanın mühafizəsində mühüm rol oynayır.

İsmayıllı şəhəri

İsmayıllı şəhəri rayonun inzibati və mədəni mərkəzidir. Şəhər həm rayon daxilində səyahət etmək, həm də ətraf kəndlərə getmək üçün əlverişli başlanğıc nöqtəsidir. Buradan Lahıc, Basqal, İvanovka, Qalacıq və digər yaşayış məntəqələrinə səfər etmək mümkündür. Şəhərdə parklar, istirahət əraziləri və yerli mətbəxi təqdim edən iaşə obyektləri fəaliyyət göstərir. İsmayıllı şəhərinin ətrafındakı dağlıq və meşəlik ərazilər də bölgənin ümumi mənzərəsini tamamlayır.

Qalacıq kəndi

Qalacıq İsmayıllının dağlıq ərazidə yerləşən tanınmış kəndlərindən biridir. Kənd dağlar, meşələr və çay dərələri ilə əhatələnib. Burada ənənəvi kənd həyatını və yerli əhalinin təsərrüfat fəaliyyətini yaxından müşahidə etmək mümkündür. Qalacığın ətrafındakı təbiət piyada gəzintiləri və sakit istirahət üçün əlverişli şərait yaradır. Kənd xüsusilə İsmayıllının təbiətini və kənd mühitini birlikdə görmək istəyənlərin diqqətini çəkir.

İvanovka

İvanovka İsmayıllının fərqli mədəni xüsusiyyətlərə malik kəndlərindən biridir. Burada Azərbaycanda yaşayan molokan icmasının nümayəndələri məskunlaşıb. Kəndin tarixi XIX əsrdə Rusiya imperiyası dövründə bölgəyə köçürülən molokanlarla bağlıdır. İvanovkada kənd təsərrüfatı, heyvandarlıq və süd məhsullarının istehsalı geniş yayılıb. Pendir, xama, bal və digər yerli məhsullar kənd təsərrüfatının mühüm hissəsini təşkil edir. Fərqli memarlığı və qorunan məişət ənənələri İvanovkanı İsmayıllının maraqlı turizm istiqamətlərindən birinə çevirir.

Cavanşir qalası

Cavanşir qalası İsmayıllının Talıstan kəndi yaxınlığında yerləşən mühüm tarixi abidədir. Erkən orta əsrlərə aid edilən qala Qafqaz Albaniyasının tarixi ilə əlaqələndirilir və adı hökmdar Cavanşirlə bağlıdır. Dağlıq ərazidə inşa edilən qala əlverişli müdafiə mövqeyinə malik olub. Abidə daxili və xarici müdafiə hissələrindən ibarətdir və tikintisində əsasən yerli daşlardan istifadə edilib. Qalanın bəzi divarları və digər hissələri bu günə qədər qorunub saxlanılıb. Cavanşir qalasına gedən yol həm də İsmayıllının dağ və meşə mənzərələrini görməyə imkan verir.