Masallıda gəzməli yerlər
Masallı Azərbaycanın cənub bölgəsində yerləşir. Rayon bölgənin ən əhəmiyyətli turizm mərkəzlərindən biridir. Həm təbiəti, həm də zəngin flora və faunası ilə seçilir. Masallı bir tərəfdən Xəzər dənizi, digər tərəfdən Talış dağları ilə həmsərhəd yerdə yerləşir. Son illər rayonda müasir tipli istirahət kəndlərinin və turizm obyektlərinin salınması, yol infrastrukturunun yaxşılaşdırılması istiqamətində addımlar atılır. Tur.az saytı Masallının gözəllikləri ilə sizləri tanış edir.
Viləş çayı və termal sular
Masallı təbiəti öz qonaqlarını möhtəşəm şəkildə qarşılayır. Rayonun ən tanınmış təbii sərvətlərindən biri olan Viləş axını regionun mühüm su yollarıdir. İran və Lerik rayonlarından başlayan bu çayın uzunluğu 115 kilometrdir. Viləşçay bəndi 1976-cı ildə Heydər Əliyevin rəhbərliyi ilə tikilib. Bu bənd rayonun suya ehtiyacını ödəməkdən əlavə, turizm baxımından da böyük rəğbət qazanmışdır. Masallı həm də termal su mənbələri ilə məşhurdur. Xüsusilə, İstisu adlı termal kurort bölgədəki turistlər üçün sağlamlıq baxımından böyük əhəmiyyət kəsb edir.
Masallının tarixi nöqtələri
Masallının tarixi və mədəni irsi turistlər üçün kəşf edilməli çoxlu yerlər təqdim edir. Rayon tarixi qalalar, ziyarətgahlar, hamamlar və qədim tikililərlə zəngindir. Masallıda 168 tarixi bina mövcuddur. Bildirilir ki, bunlardan 51-i tarix və memarlıq baxımından mühüm, 70-i isə arxeoloji dəyərə malikdir. Bu bölgədə ən diqqət çəkən tarixi tikililərdən biri də yerli əhalinin inancları ilə bağlı istifadə edilən köhnə ziyarətgahlar və monastırlardır.
Azərbaycanın folklor paytaxtı
Masallı təkcə təbiəti və tarixi turizmi ilə deyil, mədəni fəaliyyətləri ilə müşhurdur. 2012-ci ildə "Azərbaycanın Folklor Paytaxtı" elan edilən Masallı bu adı müxtəlif beynəlxalq festivallarla daha da möhkəmləndirib. Hər il keçirilən Masallı Folklor Festivalı rayona gələn turistlərə Azərbaycanın zəngin folklor irsini tanıtmaq üçün gözəl imkan yaradır. Bu festivalda Azərbaycanla yanaşı, Türkiyə, Rusiya, İran, Gürcüstan, Özbəkistan və Ukrayna kimi bir çox müxtəlif ölkələrdən folklor qrupları iştirak edir. Masallıda keçirilən musiqi gecələri və yerli sənətkarlıq yarmarkaları turistlərin diqqətini cəlb edir.
İstirahət mərkəzləri
Masallıda turistlər üçün hər cür şərait yaradılıb. Rayonun "Viləş", "Gülüstan", "Dəştvənd", "Palma", "Cənnət bağı", "Nağıl dünyası", "Zirvə", "Dəmirağac" kimi istirahət mərkəzləri turistlərin istirahəti üçün idealdır. Burada təbiət qoynunda dinc istirahət edə, bölgənin ənənəvi mətbəxini dadmaq olar.
